rider-2026-10-v1
Conecta ರೈಡರ್ (ಡೆಲಿವರಿ ಪಾಲುದಾರ) ಒಪ್ಪಂದ
ವರ್ಷನ್ rider-2026-10-v1 · Conecta ಪಾರ್ಟ್ನರ್ ಆ್ಯಪ್ನಲ್ಲಿ ನೀವು ಒಪ್ಪಿದ ಕೂಡಲೇ ಜಾರಿಗೆ ಬರುತ್ತದೆ.
ಯಾರ ನಡುವೆ: Kalbantt Tech OPC Private Limited, CIN U85500KA2026OPC224772, ರಿಜಿಸ್ಟರ್ಡ್ ಆಫೀಸ್ ಬೆಂಗಳೂರು, ಕರ್ನಾಟಕ ("Conecta"), ಮತ್ತು ಪಾರ್ಟ್ನರ್ ಆ್ಯಪ್ನಲ್ಲಿ "ರೈಡರ್ (Rider)" ಆಯ್ಕೆ ಮಾಡಿ "ಒಪ್ಪುತ್ತೇನೆ" ಅಂತ ಟಿಕ್ ಮಾಡುವ ವ್ಯಕ್ತಿ ("ನೀವು").
1. ನೀವು ಮಾಡುವ ಕೆಲಸ. ನಿಮ್ಮ ಊರಿನ Conecta ಪಾರ್ಟ್ನರ್ ಹೋಟೆಲ್ಗಳಿಂದ ಬುತ್ತಿ ಆರ್ಡರ್ ತಗೊಂಡು ಗ್ರಾಹಕರ ಅಡ್ರೆಸ್ಗೆ ಡೆಲಿವರಿ ಮಾಡುತ್ತೀರಿ. ಇದಕ್ಕೆ ನಿಮ್ಮದೇ ಟೂ-ವೀಲರ್ ಮತ್ತು ಫೋನ್ ಬಳಸುತ್ತೀರಿ, Conecta ಪಾರ್ಟ್ನರ್ ಆ್ಯಪ್ ಮೂಲಕ. ನೀವು ಸ್ವತಂತ್ರ ಡೆಲಿವರಿ ಪಾಲುದಾರರು, ನೌಕರರಲ್ಲ. ಯಾವಾಗ ಆನ್ಲೈನ್ ಇರಬೇಕು ಅಂತ ನೀವೇ ತೀರ್ಮಾನಿಸುತ್ತೀರಿ. ಯಾವ ಜಾಬ್ ಆಫರ್ ಬೇಕಾದರೂ ಬೇಡ ಅನ್ನಬಹುದು. ಈ ಒಪ್ಪಂದದಿಂದ ನೌಕರಿ, ಏಜೆನ್ಸಿ ಅಥವಾ ಪಾರ್ಟ್ನರ್ಶಿಪ್ ಸಂಬಂಧ ಏನೂ ಆಗುವುದಿಲ್ಲ.
2. ಯಾರು ಸೇರಬಹುದು. ನಿಮಗೆ 18 ವರ್ಷ ಅಥವಾ ಹೆಚ್ಚು ಆಗಿರಬೇಕು. ಚಾಲ್ತಿಯಲ್ಲಿರುವ ಡ್ರೈವಿಂಗ್ ಲೈಸೆನ್ಸ್, ಗಾಡಿ ರಿಜಿಸ್ಟ್ರೇಶನ್ (RC) ಮತ್ತು ಇನ್ಶೂರೆನ್ಸ್ ಇರಬೇಕು. ಇಂಟರ್ನೆಟ್ ಮತ್ತು GPS ಇರುವ Android ಅಥವಾ iPhone ಇರಬೇಕು. ನಿಮ್ಮ ಹೆಸರಿನಲ್ಲೇ ಬ್ಯಾಂಕ್ ಖಾತೆ ಇರಬೇಕು, KYCಗೆ PAN ಅಥವಾ ಆಧಾರ್ ಇರಬೇಕು. ಕಳ್ಳತನ, ಹಲ್ಲೆ ಅಥವಾ ಲೈಂಗಿಕ ಅಪರಾಧಕ್ಕೆ ನಿಮಗೆ ಶಿಕ್ಷೆ ಆಗಿರಬಾರದು. ಈ ದಾಖಲೆಗಳನ್ನು ನೀವು ಆ್ಯಪ್ನಲ್ಲಿ ಅಪ್ಲೋಡ್ ಮಾಡುತ್ತೀರಿ. Conecta ಅವನ್ನು ಚೆಕ್ ಮಾಡುತ್ತದೆ. ಪೊಲೀಸ್ ವೆರಿಫಿಕೇಶನ್ ಸರ್ಟಿಫಿಕೇಟ್ ಕೂಡ ಕೇಳಬಹುದು.
3. ಆನ್ಲೈನ್ ಆಗುವುದು. ಆ್ಯಪ್ನಲ್ಲಿ ಆನ್ಲೈನ್ ಇದ್ದು, GPS ಆನ್ ಇದ್ದಾಗ ಮಾತ್ರ ನಿಮಗೆ ಜಾಬ್ ಆಫರ್ ಬರುತ್ತದೆ. ಆ್ಯಪ್ ಪ್ರತಿ 90 ಸೆಕೆಂಡಿಗೊಮ್ಮೆ ನಿಮ್ಮ ಫೋನ್ ಚೆಕ್ ಮಾಡುತ್ತದೆ. ಸ್ವಲ್ಪ ಹೊತ್ತು ನಿಮ್ಮ ಫೋನ್ ಸಿಗದಿದ್ದರೆ ನಿಮ್ಮನ್ನು ಆಫ್ಲೈನ್ ಮಾಡುತ್ತದೆ. ಆಗ ಮತ್ತೆ "I'm online" ಒತ್ತಬೇಕು. ಇಷ್ಟು ಜಾಬ್ ಸಿಗುತ್ತವೆ ಅಂತ Conecta ಯಾವುದೇ ಭರವಸೆ ಕೊಡುವುದಿಲ್ಲ.
4. ಒಂದು ಜಾಬ್. 4.1 ಜಾಬ್ ಆಫರ್ನಲ್ಲಿ ಹೋಟೆಲ್, ಗ್ರಾಹಕರ ಏರಿಯಾ ಮತ್ತು ಫೀ ಕಾಣುತ್ತದೆ. ತೋರಿಸಿದ ಸಮಯದೊಳಗೆ ಒಪ್ಪಿಕೊಳ್ಳಿ, ಇಲ್ಲದಿದ್ದರೆ ಅದು ಬೇರೆ ರೈಡರ್ಗೆ ಹೋಗುತ್ತದೆ. 4.2 ಹೋಟೆಲ್ಗೆ ಹೋಗಿ, ಕೌಂಟರ್ನಲ್ಲಿ ಟೋಕನ್ ಹೇಳಿ, ಪ್ಯಾಕ್ ಆದ ಆರ್ಡರ್ ತಗೊಳ್ಳಿ, "ಪಿಕಪ್ ಆಯಿತು (Picked up)" ಒತ್ತಿ. 4.3 ಆ್ಯಪ್ನಲ್ಲಿರುವ ಅಡ್ರೆಸ್ಗೆ ಡೆಲಿವರಿ ಮಾಡಿ. ಪ್ಯಾಕೆಟ್ ತೆಗೆಯಬೇಡಿ. 4.4 ಬಾಗಿಲ ಹತ್ತಿರ ಗ್ರಾಹಕರು ತಮ್ಮ ಆ್ಯಪ್ನಲ್ಲಿ ಕಾಣುವ ಡೆಲಿವರಿ ಕೋಡ್ ನಿಮಗೆ ಹೇಳುತ್ತಾರೆ. ಅದನ್ನು ಹಾಕಿದರೆ ಜಾಬ್ ಮುಗಿಯುತ್ತದೆ. ಗ್ರಾಹಕರು ಹೇಳುವ ಮುಂಚೆ ಆ ಕೋಡ್ ನಿಮಗೆ ಯಾವತ್ತೂ ಕಾಣುವುದಿಲ್ಲ. ಮೂರು ಸಲ ತಪ್ಪು ಹಾಕಿದರೆ ಜಾಬ್ 2 ನಿಮಿಷ ಲಾಕ್ ಆಗುತ್ತದೆ. ಗ್ರಾಹಕರಿಗೆ ಕೋಡ್ ಸಿಗದಿದ್ದರೆ "Send by SMS" ಒತ್ತಲು ಅವರಿಗೆ ಹೇಳಿ, ಅಥವಾ Conecta ಗೆ ಕಾಲ್ ಮಾಡಿ — ಬೇರೆ ಯಾವ ರೀತಿಯಲ್ಲೂ "ತಲುಪಿದೆ (Delivered)" ಅಂತ ಮಾರ್ಕ್ ಮಾಡಬೇಡಿ. 4.5 ಆ್ಯಪ್ನ ಕಾಲ್ ಬಟನ್ ಬಿಟ್ಟು ಬೇರೆ ರೀತಿ ಗ್ರಾಹಕರಿಗೆ ಕಾಲ್ ಮಾಡಬೇಡಿ. ಅವರ ಫೋನ್ ನಂಬರ್ ನಿಮಗೆ ಕಾಣುವುದಿಲ್ಲ.
5. ಮುಂದುವರಿಸಲು ಆಗದಿದ್ದರೆ. ಗಾಡಿ ಕೆಟ್ಟು ಹೋದರೆ, ಆಕ್ಸಿಡೆಂಟ್ ಆದರೆ, ಅಥವಾ ಫೋನ್ ಚಾರ್ಜ್ ಮುಗಿಯುತ್ತಿದ್ದರೆ, ತಕ್ಷಣ ಆ್ಯಪ್ನಲ್ಲಿ "ಮುಂದುವರಿಸಲು ಆಗುತ್ತಿಲ್ಲ (Can't continue)" ಒತ್ತಿ, ಕಾರಣ ಆಯ್ಕೆ ಮಾಡಿ. Conecta ಆ ಜಾಬ್ ಅನ್ನು ಹತ್ತಿರದ ಇನ್ನೊಬ್ಬ ರೈಡರ್ಗೆ ಕೊಡುತ್ತದೆ. ಅವರು ನಿಮ್ಮಿಂದ ಆರ್ಡರ್ ತಗೊಳ್ಳುತ್ತಾರೆ. ಯಾರು ಬರುತ್ತಿದ್ದಾರೆ ಅಂತ ಆ್ಯಪ್ ನಿಮಗೆ ತೋರಿಸುತ್ತದೆ. ಆರ್ಡರ್ ಜೊತೆ ಸುರಕ್ಷಿತ ಜಾಗದಲ್ಲಿ ಕಾಯಿರಿ. ಆರ್ಡರ್ ಅನ್ನು ಯಾವತ್ತೂ ಹಾಗೇ ಬಿಟ್ಟು ಹೋಗಬೇಡಿ, ಮೂರನೇ ವ್ಯಕ್ತಿಯ ಕೈಗೂ ಕೊಡಬೇಡಿ.
6. ಫೀ ಮತ್ತು ಪೇಮೆಂಟ್. 6.1 ಪ್ರತಿ ಡೆಲಿವರಿ ಮುಗಿಸಿದರೆ ನಿಮಗೆ ₹10 ಸಿಗುತ್ತದೆ. ಇದನ್ನು ಪೂರ್ತಿ Conecta ಕೊಡುತ್ತದೆ. ಈ ಡೆಲಿವರಿ ಫೀ ಅನ್ನು ಗ್ರಾಹಕರು ತಮ್ಮ ಬುತ್ತಿ ಬಿಲ್ ಮೇಲೆ ಹೆಚ್ಚಾಗಿ ಕೊಡುತ್ತಾರೆ. 6.2 ನೀವು ಆರ್ಡರ್ ಪಿಕಪ್ ಮಾಡಿದ ಮೇಲೆ ಕ್ಲಾಸ್ 5 ಪ್ರಕಾರ ಜಾಬ್ ಬೇರೆ ರೈಡರ್ಗೆ ಹೋದರೆ, ₹10 ಹಂಚಿಕೆ ಆಗುತ್ತದೆ: ₹5 ನಿಮಗೆ, ₹5 ಡೆಲಿವರಿ ಮುಗಿಸುವ ರೈಡರ್ಗೆ. ಪಿಕಪ್ಗಿಂತ ಮುಂಚೆನೇ ಹೋದರೆ, ಮುಗಿಸುವ ರೈಡರ್ಗೆ ₹10. 6.3 ಪ್ರತಿ ಡೆಲಿವರಿ ಆದ 2 ಕೆಲಸದ ದಿನಗಳ ಒಳಗೆ (T+2) Conecta ನಿಮ್ಮ ಗಳಿಕೆಯನ್ನು ಬ್ಯಾಂಕ್ ಟ್ರಾನ್ಸ್ಫರ್ ಮೂಲಕ ಕೊಡುತ್ತದೆ. ಎಲ್ಲಾ ಜಾಬ್ಗಳ ಲಿಸ್ಟ್ ಆ್ಯಪ್ನ "ಗಳಿಕೆ (Earnings)" ಒಳಗೆ ಇರುತ್ತದೆ. 6.4 ಬ್ಯುಸಿ ಸಮಯದಲ್ಲಿ ಅಥವಾ ಲಾಂಚ್ ವಾರಗಳಲ್ಲಿ Conecta ಇನ್ಸೆಂಟಿವ್ ಕೊಡಬಹುದು. ಇವನ್ನು ಆ್ಯಪ್ನಲ್ಲಿ ತಿಳಿಸುತ್ತದೆ; ಇವು ಗ್ಯಾರಂಟಿ ಅಲ್ಲ. 6.5 ಪೆಟ್ರೋಲ್/ಇಂಧನ, ಫೋನ್, ಡೇಟಾ, ಗಾಡಿ ಮೆಂಟೆನೆನ್ಸ್ ಮತ್ತು ಇನ್ಶೂರೆನ್ಸ್ ಖರ್ಚು ನಿಮ್ಮದೇ. 6.6 ನಿಮ್ಮ ಗಳಿಕೆ ಮೇಲಿನ ಟ್ಯಾಕ್ಸ್ ನಿಮ್ಮ ಜವಾಬ್ದಾರಿ. ಕಾನೂನು ಹೇಳಿದಲ್ಲಿ section 194-O ಪ್ರಕಾರ TDS ಕಡಿತ ಆಗುತ್ತದೆ, ಪ್ರತಿ ಮೂರು ತಿಂಗಳಿಗೊಮ್ಮೆ ಸರ್ಟಿಫಿಕೇಟ್ ಸಿಗುತ್ತದೆ.
7. ಕ್ಯಾಶ್ ಆನ್ ಡೆಲಿವರಿ. ಕೆಲವು ಹೋಟೆಲ್ಗಳು ಕ್ಯಾಶ್ ಆರ್ಡರ್ ಒಪ್ಪುತ್ತವೆ. ಕ್ಯಾಶ್ ಜಾಬ್ನಲ್ಲಿ ಗ್ರಾಹಕರು ಆ್ಯಪ್ನಲ್ಲಿ ತೋರಿಸಿದ ಬಿಲ್ ಜೊತೆ ₹10 ಸೇರಿಸಿ ನಿಮಗೆ ಕೊಡುತ್ತಾರೆ. ₹10 ನಿಮ್ಮ ಫೀ, ಅದನ್ನು ನೀವು ಇಟ್ಟುಕೊಳ್ಳಿ. ಬಿಲ್ ಹಣವನ್ನು ಆ ಹೋಟೆಲ್ನಲ್ಲಿ ನಿಮ್ಮ ಮುಂದಿನ ಪಿಕಪ್ ಆಗುವಾಗ ಅವರಿಗೆ ಕೊಡಿ, ಇಲ್ಲವೇ ಹೆಚ್ಚೆಂದರೆ 24 ಗಂಟೆಯೊಳಗೆ ಕೊಡಿ. ಹೋಟೆಲ್ನವರು ತಮ್ಮ ಆ್ಯಪ್ನಲ್ಲಿ "ನಗದು ಸಿಕ್ಕಿತು (Cash received)" ಒತ್ತುತ್ತಾರೆ. ಒಂದು ಸಲಕ್ಕೆ ಒಂದೇ ಕ್ಯಾಶ್ ಜಾಬ್ ನಿಮ್ಮ ಹತ್ತಿರ ಇರಬಹುದು. 24 ಗಂಟೆಗಿಂತ ಹಳೆಯ ಕ್ಯಾಶ್ ಇನ್ನೂ ಕೊಡದೇ ಇದ್ದರೆ ಹೊಸ ಕ್ಯಾಶ್ ಜಾಬ್ ತಗೊಳ್ಳುವಂತಿಲ್ಲ. ಕೊಡದ ಕ್ಯಾಶ್ ನೀವು ಹೋಟೆಲ್ಗೆ ಕೊಡಬೇಕಾದ ಸಾಲ ಆಗುತ್ತದೆ, ಮತ್ತು ಅದರಿಂದ ಈ ಒಪ್ಪಂದ ಮುಗಿಯುತ್ತದೆ.
8. ನಡತೆ. ಆರ್ಡರ್ ಅನ್ನು ಸ್ವಚ್ಛ ಬ್ಯಾಗ್ನಲ್ಲಿ ನೇರವಾಗಿ (ಉಲ್ಟಾ ಆಗದಂತೆ) ಇಟ್ಟು ತಗೊಂಡು ಹೋಗಿ (Conecta ಬ್ಯಾಗ್ ಕೊಡುತ್ತದೆ; ಅದನ್ನು ಸ್ವಚ್ಛವಾಗಿ ಇಡಿ). Conecta T-ಶರ್ಟ್ ಕೊಟ್ಟಾಗ ಅದನ್ನು ಹಾಕಿಕೊಳ್ಳಿ. ಟ್ರಾಫಿಕ್ ನಿಯಮ ಪಾಲಿಸಿ, ಹೆಲ್ಮೆಟ್ ಹಾಕಿ. ಹೋಟೆಲ್ನಲ್ಲೂ ಗ್ರಾಹಕರ ಬಾಗಿಲಲ್ಲೂ ಗೌರವದಿಂದ ನಡೆದುಕೊಳ್ಳಿ; ಗ್ರಾಹಕರ ಮನೆ ಒಳಗೆ ಹೋಗಬೇಡಿ. ಆನ್ಲೈನ್ ಇರುವಾಗ ಸಾರಾಯಿ ಕುಡಿಯಬೇಡಿ, ಡ್ರಗ್ಸ್ ತಗೊಳ್ಳಬೇಡಿ. ಗ್ರಾಹಕರಿಂದ ಟಿಪ್ಸ್, ಹೆಚ್ಚಿನ ಹಣ ಅಥವಾ ಅವರ ವೈಯಕ್ತಿಕ ವಿವರ ಕೇಳಬೇಡಿ. ಗ್ರಾಹಕರಿಂದ ನೇರವಾಗಿ ಬುತ್ತಿ ಆರ್ಡರ್ ತಗೊಳ್ಳಬೇಡಿ, ಜಾಬ್ ನಡೆಯುತ್ತಿರುವಾಗ Conecta ಅಲ್ಲದ ಸಾಮಾನು ಡೆಲಿವರಿ ಮಾಡಬೇಡಿ. ನಿಮ್ಮ ಲಾಗಿನ್ ಕೋಡ್ ಯಾರ ಜೊತೆಯೂ ಹಂಚಿಕೊಳ್ಳಬೇಡಿ, ನಿಮ್ಮ ಅಕೌಂಟ್ ಬೇರೆ ಯಾರಿಗೂ ಬಳಸಲು ಬಿಡಬೇಡಿ.
9. ತೊಂದರೆಗಳು. ಆಕ್ಸಿಡೆಂಟ್ ಆದರೆ, ಆರ್ಡರ್ ಚೆಲ್ಲಿದರೆ ಅಥವಾ ಹಾಳಾದರೆ, ಗ್ರಾಹಕರು ಜಗಳಕ್ಕೆ ಬಂದರೆ, ಅಥವಾ ಹೋಟೆಲ್ ಜೊತೆ ತಕರಾರು ಆದರೆ — ತಕ್ಷಣ ಆ್ಯಪ್ನಲ್ಲಿ ಅಥವಾ WhatsApp +91 74837 59960 ಗೆ ತಿಳಿಸಿ. ಗ್ರಾಹಕರಿಗೆ ಎಷ್ಟು ರಿಫಂಡ್ ಕೊಡಬೇಕು, ನಿಮ್ಮ ಫೀ ಕೊಡಬೇಕೋ ಬೇಡವೋ ಅನ್ನುವುದನ್ನು ಆ್ಯಪ್ನಲ್ಲಿರುವ ದಾಖಲೆ ನೋಡಿ Conecta ತೀರ್ಮಾನಿಸುತ್ತದೆ. ಹೋಟೆಲ್ ಪ್ಯಾಕಿಂಗ್ನಿಂದ ಚೆಲ್ಲಿದರೆ ಅದನ್ನು ನಿಮ್ಮ ಮೇಲೆ ಹಾಕುವುದಿಲ್ಲ.
10. ಸ್ಟ್ರೈಕ್ ಮತ್ತು ಸಸ್ಪೆನ್ಷನ್. ಇವುಗಳಿಗೆ ಒಂದು ಸ್ಟ್ರೈಕ್ (ಎಚ್ಚರಿಕೆ ಗುರುತು) ದಾಖಲಾಗುತ್ತದೆ: ಜಾಬ್ ನಡೆಯುತ್ತಿರುವಾಗ ಉತ್ತರ ಕೊಡದಿರುವುದು; ಸುಳ್ಳಾಗಿ "ಪಿಕಪ್ ಆಯಿತು (Picked up)" ಅಥವಾ "ತಲುಪಿದೆ (Delivered)" ಮಾರ್ಕ್ ಮಾಡುವುದು; 24 ಗಂಟೆ ಮೀರಿದ ಕ್ಯಾಶ್ ಸೆಟಲ್ಮೆಂಟ್; ಅಥವಾ ನೀವು ಅಸಭ್ಯವಾಗಿ ನಡೆದುಕೊಂಡಿರಿ ಅಂತ ಗ್ರಾಹಕರು ದೂರು ಕೊಟ್ಟು, ಅದು ಸರಿ ಅಂತ Conecta ಒಪ್ಪಿದರೆ. ಒಂದು ತಿಂಗಳಲ್ಲಿ ಮೂರು ಸ್ಟ್ರೈಕ್ ಆದರೆ: 7 ದಿನ ಸಸ್ಪೆನ್ಷನ್. ಯಾವುದೇ ಕಳ್ಳತನ, ಸುಳ್ಳು ಡೆಲಿವರಿ, ಹಲ್ಲೆ, ಅಥವಾ ಗ್ರಾಹಕರ ಮಾಹಿತಿ ಬೇರೆಯವರಿಗೆ ಕೊಡುವುದು: ತಕ್ಷಣ ಒಪ್ಪಂದ ರದ್ದು, ಮತ್ತು ಬೇಕಾದಲ್ಲಿ ಪೊಲೀಸ್ ದೂರು.
11. ಮಾಹಿತಿ ಮತ್ತು ಲೊಕೇಶನ್. ನೀವು ಆನ್ಲೈನ್ ಇರುವಾಗ ಮತ್ತು ಜಾಬ್ ನಡೆಯುವಾಗ ಆ್ಯಪ್ ನಿಮ್ಮ ಲೊಕೇಶನ್ ದಾಖಲಿಸುತ್ತದೆ — ನಿಮಗೆ ಜಾಬ್ ಕೊಡಲು ಮತ್ತು ಗ್ರಾಹಕರಿಗೆ ಅವರ ಡೆಲಿವರಿ ಎಲ್ಲಿವರೆಗೆ ಬಂತು ಅಂತ ತೋರಿಸಲು. ನೀವು ಆಫ್ಲೈನ್ ಆದ ಕೂಡಲೇ ಇದು ನಿಲ್ಲುತ್ತದೆ. ಜಾಬ್ ನಡೆಯುವಾಗ ನಿಮ್ಮ ಹೆಸರು ಮತ್ತು ಗಾಡಿ ವಿವರ ಗ್ರಾಹಕರಿಗೆ ಕಾಣುತ್ತದೆ; ನಿಮ್ಮ ಫೋನ್ ನಂಬರ್ ಕಾಣುವುದಿಲ್ಲ. ಪೂರ್ತಿ ವಿವರ ವೆಂಡರ್ ಪ್ರೈವಸಿ ನೋಟಿಸ್ ನಲ್ಲಿ ಇದೆ; ಅದು ರೈಡರ್ಗಳಿಗೂ ಅನ್ವಯಿಸುತ್ತದೆ.
12. ಇನ್ಶೂರೆನ್ಸ್ ಮತ್ತು ರಿಸ್ಕ್. ಗಾಡಿ ಓಡಿಸುವ ರಿಸ್ಕ್ ನಿಮ್ಮದೇ. Conecta ನಿಮಗಾಗಲಿ ನಿಮ್ಮ ಗಾಡಿಗಾಗಲಿ ಇನ್ಶೂರೆನ್ಸ್ ಮಾಡಿಸುವುದಿಲ್ಲ; ನೀವೇ ಪರ್ಸನಲ್ ಆಕ್ಸಿಡೆಂಟ್ ಇನ್ಶೂರೆನ್ಸ್ ಇಟ್ಟುಕೊಳ್ಳುವುದು ಒಳ್ಳೆಯದು. ಜಾಬ್ ಸಮಯದಲ್ಲಿ ಆಗುವ ಯಾವುದೇ ಆಕ್ಸಿಡೆಂಟ್, ದಂಡ, ನಷ್ಟ ಅಥವಾ ಗಾಯಕ್ಕೆ Conecta ಜವಾಬ್ದಾರಿ ಅಲ್ಲ — ಕಾನೂನು ಹೇಳುವಷ್ಟನ್ನು ಬಿಟ್ಟು.
13. ಅವಧಿ. ನೀವು ಅಥವಾ Conecta, ಯಾರಾದರೂ ಆ್ಯಪ್ನಲ್ಲಿ 7 ದಿನದ ನೋಟಿಸ್ ಕೊಟ್ಟು ಮುಗಿಸುವವರೆಗೆ, ಅಥವಾ ಕ್ಲಾಸ್ 10 ಪ್ರಕಾರ Conecta ತಕ್ಷಣ ಮುಗಿಸುವವರೆಗೆ ಈ ಒಪ್ಪಂದ ಜಾರಿಯಲ್ಲಿರುತ್ತದೆ. ಒಪ್ಪಂದ ಮುಗಿದ 7 ಕೆಲಸದ ದಿನಗಳ ಒಳಗೆ ಬಾಕಿ ಗಳಿಕೆ ಕೊಡಲಾಗುತ್ತದೆ — ನೀವು ಕೊಡಬೇಕಾದ ಕ್ಯಾಶ್ ಕಳೆದು. ಒಪ್ಪಂದ ಮುಗಿದಾಗ Conecta ಬ್ಯಾಗ್ ಮತ್ತು T-ಶರ್ಟ್ ವಾಪಸ್ ಕೊಡಿ.
14. ಸಾಮಾನ್ಯ. ಭಾರತೀಯ ಕಾನೂನು ಅನ್ವಯಿಸುತ್ತದೆ; ಕೋರ್ಟ್ ಬೆಂಗಳೂರು, ಕರ್ನಾಟಕ. Conecta ಆ್ಯಪ್ನಲ್ಲಿ 30 ದಿನದ ನೋಟಿಸ್ ಕೊಟ್ಟು ಈ ಒಪ್ಪಂದ ಬದಲಿಸಬಹುದು; ದೊಡ್ಡ ಬದಲಾವಣೆಗಳಿಗೆ ಮತ್ತೆ ಹೊಸದಾಗಿ "ಒಪ್ಪುತ್ತೇನೆ" ಬೇಕು. ಕನ್ನಡ ಆವೃತ್ತಿ ಒಂದು ಅನುವಾದ; ಇಂಗ್ಲಿಷ್ ಪಠ್ಯವೇ ಅಂತಿಮ. ದೂರುಗಳಿಗೆ: grievanceofficer@kalbantt.in — 30 ದಿನದೊಳಗೆ ಉತ್ತರ ಸಿಗುತ್ತದೆ. "ಒಪ್ಪುತ್ತೇನೆ" ಟಿಕ್ ಮಾಡಿ ಒಪ್ಪಿದಾಗ ದಿನಾಂಕ, ಸಮಯ ಮತ್ತು ಫೋನ್ ನಂಬರ್ ದಾಖಲಾಗುತ್ತದೆ; ಅದು ಸರಿಯಾದ ಎಲೆಕ್ಟ್ರಾನಿಕ್ ಸಹಿ.